Мәдениет және спорт министрі «Әбіш әлемі» атты оқу конгресіне қатысты
Бүгін Нұр-Сұлтан қаласында ҚР Мәдениет және спорт министрлігінің, ҚР Білім және ғылым министрлігінің, сондай-ақ, Нұр-Сұлтан қаласы әкімдігінің қолдауымен Қазақстанның халық жазушысы, мемлекет және қоғам қайраткері Әбіш Кекілбайұлының 80 жылдық мерейтойына орай «Әбіш әлемі» атты оқу конгресі өтті.
Салтанатты шараға ҚР Мәдениет және спорт министрі Ақтоты Райымқұлова, филология ғылымдарының докторы, профессор, жазушы Мырзатай Жолдасбеков, Қазақстан Жазушылар одағының басқарма төрағасы Ұлықбек Есдәулет, жазушы, ҚР Мемлекеттік сыйлығының лауреаты Төлен Әбдік, сыншы, әдебиеттанушы, мемлекет және қоғам қайраткері Сұлтан Оразалинов және т.б. қатысты.
Алқалы басқосуда Мемлекеттік хатшы Қ.Көшербаевтың құттықтау хатын оқып берген Мәдениет және спорт министрі А.Райымқұлова жиналғандарға ақжолтай жаңалықты жеткізді.
«Абыз ағамыздың шығармалары әлемнің 16 тіліне, соның ішінде биыл «Аңыздың ақыры» романы орыс, ағылшын, француз тілдеріне аударылды. Әбіш ағаның шығармашылығын насихаттау мақсатында елімізде көптеген шаралар атқарылды. Соның ішінде Әбіш Кекілбаевтың «Аңыздың ақыры» романы Қазақстан Республикасының Ұлттық академиялық кітапханасының ең үздік жобаларының бірі «Бір ел – бір кітап» республикалық акциясы аясында жалпыхалықтық оқуға ие болды. 4 мыңнан астам отандық кітапхананы қамтыған бұл жоба аясында 700 мыңнан астам оқырман Әбіш ағамыздың шығармасын оқыды»,- деді Ақтоты Райымқұлова.
Бұл ретте кітаптың оқырманға жетуіне дәнекер болатын қасиетті орын – кітапхананың, кітап пен авторды кездестіретін рухани орданың шырақшылары – кітапханашылардың еңбегіне ерекше тоқталған министр алдағы жылдан сала қызметкерлерінің жалақысы 50 пайызға өсетінін айтты.
Жазушының шығармашылығын, қазақ әдебиетінің құндылықтарын халықаралық ғылыми білім беру жүйесінде насихаттау және көпшілікке таратуды мақсат тұтқан конгресс аясында Әбіш Кекілбайұлының 20 томдық кітаптарының тұсаукесері өтті.
